आंतरराष्ट्रीय आतंकवादी दाऊद इब्राहिम याच्या लोटे (तालुका खेड) येथील मालमत्तेचा लिलाव

घाणेखुंट (तालुका खेड) येथील रवींद्र काते यांनी १ कोटी १० लाख रुपयांची बोली लावून लिलाव जिंकला

खेड – आंतरराष्ट्रीय आतंकवादी दाऊद इब्राहिम कासकर याच्या लोटे येथील मालमत्तेचा लिलाव तालुक्यातील घाणेखुंट येथील रवींद्र काते यांनी १ कोटी १० लाख रुपयांची बोली लावून जिंकला. ‘व्हिडिओ कॉन्फरन्सिंग’द्वारे झालेल्या या लिलावप्रक्रियेत देहली येथील अधिवक्ता भुपेंद्रकुमार भारद्वाज आणि घाणेखुंट येथील रवींद्र काते यांनी सहभाग नोंदवला होता.

रत्नागिरी जिल्ह्यात दाऊद इब्राहिम याच्या ७ वेगवेगळ्या मालमत्तांचा केंद्रशासनाच्या वित्त मंत्रालयाकडून लिलाव करण्याचा निर्णय घेण्यात आला होता. त्यानुसार दाऊद याच्या मूळगावी म्हणजेच तालुक्यातील मुंबके येथे असलेल्या बंगल्याचा लिलाव १० नोव्हेंबर या दिवशी ‘व्हिडिओ कॉन्फरन्सिंग’द्वारे करण्यात आला होता; मात्र तालुक्यातील लोटे येथील १५०, १५१, १५२, १५३ आणि १५५ या क्रमांकाच्या भूखंडाचा लिलाव काही कारणास्तव करण्यात आला नव्हता. या भूखंडाचे राखीव मूल्य ६१ लाख ४८ सहस्र १०० रुपये निश्‍चित करण्यात आले होते.