Bishnoi Gang Encounter : बिश्नोई टोळीतील २ गुंड पोलीस चकमकीत ठार

बहादूरगड (हरियाणा) – हरियाणा आणि देहली पोलिसांच्या संयुक्त कारवाईत गुंड लॉरेन्स बिश्नोई टोळीतील प्रवेश अन् हिमांशू हे २ गुंड येथे पोलिसांशी झालेल्या चकमकीत ठार झाले. हे दोघे जण एका व्यायामशाळेच्या संचालकाच्या हत्येच्या प्रकरणात पसार होते. त्यांना पकडून देणार्‍यांना हरियाणा पोलिसांनी प्रत्येकी १ लाख रुपयांचे पारितोषिक देण्याची घोषणा यापूर्वी केली होती. या चकमकीत देहली पोलिसांचा एक हवालदारही घायाळ झाला असून त्याच्यावर उपचार चालू आहेत.

गुप्त माहितीच्या आधारे पोलिसांनी दोघांना घेरून आत्मसमर्पण करण्यास सांगितले; मात्र त्यांनी पोलिसांवरच गोळीबार केला. त्यानंतर आत्मसंरक्षणासाठी पोलिसांनी केलेल्या प्रत्युत्तरात दोघे गंभीर घायाळ झाले. रुग्णालयात नेल्यानंतर डॉक्टरांनी त्यांना मृत घोषित केले.