Golden Triangle Scam : ‘गोल्डन ट्रँगल’मध्ये ८०० भारतीय ओलीस : महाराष्ट्रातील २५ तरुणांचा समावेश

नवी देहली – थायलंड-म्यानमार सीमेवरील कुप्रसिद्ध ‘गोल्डन ट्रँगल’ भागातील सायबर ठगांच्या अड्ड्यांवर विविध देशांतील अनुमाने ५ सहस्र ३०० नागरिकांना ओलीस ठेवण्यात आले असून त्यात अनुमाने ८०० भारतीय नागरिकांचा समावेश आहे. महाराष्ट्रातील किमान २५ तरुणांचाही यामध्ये समावेश आहे. बँकॉकमध्ये चांगल्या पगाराच्या नोकरीचे आमीष दाखवून त्यांना तेथे नेण्यात आल्याची माहिती उघड झाली आहे.

‘सिव्हिल सोसायटी नेटवर्क फॉर ह्युमन ट्रॅफिकिंग व्हिक्टिम असिस्टन्स’ या संस्थेने दिलेल्या माहितीनुसार ५ सहस्र ३०० ओलिसांमध्ये चीनचे १ सहस्र ६०० नागरिक, म्यानमारचे २००, थायलंडचे २० नागरिक, तसेच फिलिपाइन्स, तैवान, मलेशिया, ब्राझिल, रशिया, केनिया, युगांडा, रवांडा आणि झिम्बाब्वे या देशांतीला नागरिकांचाही समावेश आहे.

ओलिसांच्या सुटकेसाठी केंद्र सरकार आणि महाराष्ट्र सरकार यांचे प्रयत्न चालू

या तरुणांच्या सुटकेसाठी केंद्र आणि महाराष्ट्र राज्य सरकार यांनी प्रयत्न चालू केले आहेत. परराष्ट्र मंत्रालय आणि बँकॉकमधील भारतीय दूतावास यांच्याशी समन्वय साधला जात असून महाराष्ट्राचे मंत्री गिरीश महाजन, खासदार अशोक चव्हाण आणि माजी मंत्री धनंजय मुंडे यांनीही या प्रकरणात पुढाकार घेतला आहे. संयुक्त राष्ट्रांच्या अंदाजानुसार म्यानमारमधील अशा केंद्रांमध्ये १ लाखांहून अधिक लोकांना सक्तीने काम करण्यास भाग पाडले जात आहे. भारताने गेल्या दीड-दोन वर्षांत अशा केंद्रांतून २ सहस्र ४०० हून अधिक भारतियांची सुटका केली आहे.