New FCRA Rules : ‘धार्मिक कृती’च्या नावाखाली धर्मांतर करणार्‍यांच्या परदेशी देणग्यांवर केंद्र सरकारचा प्रहार  

नवी देहली – केंद्र सरकारने परदेशी अंशदान नियमन कायद्याच्या (‘एफ्.सी.आर्.ए.’ अर्थात् ‘फारेन कंट्रीब्युशन रेग्युलेशन ॲक्ट’च्या) नियमांमध्ये मोठा पालट केला आहे. नवीन सुधारणांनुसार धर्मांतराला आता श्रद्धा आधारित कृतींचा भाग मानले जाणार नाही. सरकारच्या या पावलाचा थेट परिणाम अशा खासगी संस्था, धार्मिक संस्था आणि धर्मादाय संस्था यांवर पडेल ज्या विदेशी देणग्यांच्या माध्यमातून धर्मांतराचा कट रचतात.

१. गृह मंत्रालयाने प्रसारित केलेल्या अधिसूचनेत असे स्पष्ट केले आहे की, नवीन नियमांनुसार धार्मिक शिक्षण, पूजा-अर्चा, प्रार्थना सभा, आध्यात्मिक कार्यक्रम, धार्मिक साहित्याचे ज्ञान देणे किंवा समुदाय आधारित धार्मिक सेवा या गोष्टी श्रद्धा आधारित कृतींच्या श्रेणीत रहातील.

२. असे असले, तरी कोणत्याही व्यक्तीवर धर्म परिवर्तनासाठी दबाव आणणे, त्याला प्रभावित करणे किंवा धर्म पालटण्यासाठी मोहीम चालवणे हे ‘धार्मिक सेवा’ या श्रेणीतून बाहेर मानले जाईल.

३. जर एखादी संस्था परदेशी देणग्यांचा वापर धर्मप्रसार किंवा धर्मांतर या संबंधित कृतींमध्ये करतांना आढळली, तर तिच्याविरुद्ध या कायद्यांतर्गत कारवाई केली जाऊ शकते.

४. अशा प्रकरणांमध्ये देणग्यांच्या वापराची चौकशी, परवान्याशी संबंधित कारवाई किंवा इतर कायदेशीर पावले उचलली जाऊ शकतात.