Maharashtra Uniform Civil Code : महाराष्ट्रात सिद्ध केले जाणार समान नागरी कायद्याचे प्रारूप ! – योगेश कदम, गृहराज्यमंत्री

मुंबई, २३ जून (वार्ता.) – महाराष्ट्रात समान नागरी कायदा लागू करण्यात येणार आहे. मुख्यमंत्री देवेंद्र फडणवीस यांच्या सूचनेनुसार समान नागरी कायद्याचा मसुदा बनवण्यासाठी मुंबई उच्च न्यायालयाच्या निवृत्त न्यायमूर्तींच्या अध्यक्षतेखाली समिती स्थापन करण्यात येणार आहे. या समितीच्या अहवालानंतर महाराष्ट्रात समान नागरी कायद्याचा निर्णय घेतला जाईल. समान नागरी कायद्यासाठी शासन सकारात्मक आहे, अशी माहिती गृहराज्यमंत्री (शहर) योगेश कदम यांनी २३ जून या दिवशी विधानसभेत दिली.

भाजपच्या आमदार सौ. देवयानी फरांदे यांनी ‘राज्यात तिहेरी तलाकसारख्या अनिष्ट प्रथांवर कडक कारवाई करावी’, याविषयी विधानसभेत लक्षवेधी सूचना उपस्थित केली होती. या लक्षवेधीला उत्तर देतांना राज्यमंत्री योगेश कदम यांनी सभागृहात सांगितले, ‘‘समान नागरी कायदा हा सर्व धर्मियांसाठी असेल. याद्वारे मुसलमान धर्मातील बहुपत्नीत्व प्रथेवरही निर्बंध येतील.’’