व्हीलचेअरअभावी आजारी महिला नगरसेविकेला उचलून नेण्याची नामुष्की !

(‘व्हीलचेअर’ म्हणजे चाकांची आसंदी)

छत्रपती संभाजीनगर (वार्ताहर) – छत्रपती संभाजीनगर-जालना स्थानिक स्वराज्य संस्था मतदारसंघाच्या विधान परिषद निवडणुकीच्या मतदानाच्या वेळी येथील पंचायत समिती इमारतीमधील मतदान केंद्रावर निवडणूक प्रशासनाचा अत्यंत ढिसाळ आणि दायित्वशून्य कारभार समोर आला. मतदानासाठी आलेल्या भाजपच्या आजारी नगरसेविका सत्यभामा शिंदे यांना चालता येत नसतांनाही केंद्र परिसरात ‘व्हीलचेअर’ची कोणतीही व्यवस्था उपलब्ध नव्हती. अंततः उपस्थित भाजपचे प्रवक्ते तथा नगरसेवक प्रमोद राठोड आणि इतर सहकारी यांनी त्यांना आसंदीवर उचलून मतदान केंद्रात नेले. या दुरवस्थेचा जाब विचारणार्‍या लोकप्रतिनिधींचा पोलिसांशी वाद झाला.

नगरसेवक प्रमोद राठोड यांनी आरोप केला आहे की, सुविधांच्या अभावाचा जाब विचारला असता अधिकार्‍यांनी चुकीच्या भाषेचा वापर करून आमचा अवमान केला आहे. याविषयी आम्ही निवडणूक आयोगाकडे रितसर तक्रार करणार आहोत. या गंभीर प्रकरणावर निवडणूक निर्णय अधिकारी सविता चौधर यांनी स्वतःचा बचाव करत दावा केला की, मतदान केंद्रावर सर्व सोयी उपलब्ध होत्या. वैद्यकीय सुविधेची आधी कोणतीही मागणी नोंदवली नव्हती. आमचे कर्मचारी सुविधा देईपर्यंत त्यांनी थांबणे आवश्यक होते.