सनातन प्रभात > Post Type > बातम्या > राष्ट्रीय बातम्या > Mathura Krishna Janmasthan Donation : मथुरेतील श्रीकृष्ण जन्मस्थानाला मिळणार्‍या देणगीची चौकशी व्हावी ! – हिंदुत्वनिष्ठ दिनेश फलाहारी

Mathura Krishna Janmasthan Donation : मथुरेतील श्रीकृष्ण जन्मस्थानाला मिळणार्‍या देणगीची चौकशी व्हावी ! – हिंदुत्वनिष्ठ दिनेश फलाहारी

  • हिंदुत्वनिष्ठ दिनेश फलाहारी यांनी मुख्यमंत्री योगी आदित्यनाथ यांना रक्ताने पत्र लिहून केली मागणी

  • चौकशी झाली नाही, तर न्यायालयात याचिका प्रविष्ट करण्याची दिली चेतावणी

मथुरा (उत्तरप्रदेश) – अयोध्येतील श्रीराममंदिरातील दानपेटीतील चोरीच्या प्रकरणाची चौकशी चालू आहे. अशातच आता मथुरा येथील श्रीकृष्ण जन्मस्थानावर मिळणार्‍या देणगीची सीबीआय चौकशी करण्याची मागणी हिंदुत्वनिष्ठ नेते दिनेश फलाहारी यांनी मुख्यमंत्री योगी आदित्यनाथ यांना रक्ताने पत्र लिहून केली आहे. ‘जर तुम्ही चौकशी केली नाही, तर आम्ही अलाहाबाद उच्च न्यायालयात याचिका प्रविष्ट करू’, अशी चेतावणीही त्यांनी दिली. विशेष म्हणजे फलाहारी यांनी स्वतः ‘श्रीकृष्ण जन्मभूमी संघर्ष न्यासा’ची स्थापना केली असून ते श्रीकृष्णजन्मभूमी वादात पक्षकार म्हणून खटला लढत आहेत.

एकेकाळी दुचाकीवर फिरणारे व्यवस्थापन समितीचे सदस्य आज कोट्यवधी रुपयांच्या गाड्यांतून फिरतात ?

फलाहारी यांनी पत्रात लिहिले की, जेव्हा जेव्हा मंदिराच्या दानपेट्या उघडल्या जातात, तेव्हा तेव्हा सीसीटीव्ही कॅमेरे बंद केले जातात. रुपये, दागिने, सोने, चांदी, हिरे-जवाहिर या सर्वांची लूट केली जाते. जे व्यवस्थापन समितीचे सदस्य पूर्वी दुचाकी वाहनावरून येत होते, ते आज कोट्यवधी रुपयांच्या गाड्यांतून फिरतात. त्यांच्याकडे आता कोट्यवधी-अब्जावधी रुपयांचे बंगले, कोठ्या आणि फार्महाऊस (शेतघर) आहेत. त्यांनी उत्तराखंडमध्येही भूमी खरेदी केली आहे. कोट्यवधी हिंदूंच्या श्रद्धेशी हा खेळ होत आहे आणि हे अत्यंत दुःखद आहे. (जर या दाव्यात तथ्य असेल, तर हा अक्षम्य अपराध आहे. मुख्यमंत्री योगी आदित्यनाथ यांनी याची प्राधान्याने चौकशी करावी, अशी श्रीकृष्णाच्या भक्तांची प्रार्थना ! – संपादक)

नूतन लेख