विठ्ठल-रुक्मिणी मंदिरे समिती ‘गोमाता पालन-संवर्धन केंद्र’ उभारणार !

मुंबई – पंढरपूर येथील विठ्ठल-रुक्मिणी मंदिरे समिती ३ हेक्टर १२ गुंठे इतक्या भूमीवर ‘गोमाता पालन-संवर्धन केंद्र’ उभारणार आहे. यासाठी पंढरपूरच्या यमाई तलावालगतची गट क्र. १६१ मधील भूमी महाराष्ट्र शासनाकडून देवस्थानाला देण्यात आली आहे. मुख्यमंत्री देवेंद्र फडणवीस यांच्या आदेशाने महसूलमंत्री चंद्रशेखर बावनकुळे यांनी हा निर्णय घेतला आहे.

विठ्ठल-रुक्मिणी मंदिरे समितीच्या कार्यकारी अधिकार्‍यांनी ‘गोमाता पालन-संवर्धन केंद्रासाठी या जागेची मागणी केली होती. येत्या ३ वर्षांच्या आत या जागेवर ‘गोमाता पालन-संवर्धन केंद्र’ चालू करणे बंधनकारक रहाणार आहे. ज्या कारणासाठी शासनाने ही भूमी दिली आहे, त्याच कारणासाठी त्याचा उपयोग करणे बंधनकारक रहाणार आहे. अन्य कोणत्या कारणासाठी या भूमीचा उपयोग करावयाचा झाल्यास त्यासाठी शासनाची अनुमती घ्यावी लागणार आहे.