सातारा नगर परिषदेकडून राधिका रस्त्यावरील अतिक्रमणे हटवली !

सातारा, १० जून (वार्ता.) – सातारा नगर परिषदेच्या अतिक्रमण विभागाने ८ जून या दिवशी राधिका रस्त्यावरील अनधिकृत टपर्‍या हटवल्या. हटवलेल्या १९ टपर्‍यांपैकी ७ टपर्‍या शासनाधीन करण्यात आल्या आहेत. समर्थ मंदिर परिसरातील कारवाईनंतर नगर परिषदेने राधिका रस्त्यावरील कारवाई केली.

नगर परिषदेचे १० कर्मचारी २ जेसीबी आणि आवश्यक यंत्रणेसह अतिक्रमण काढण्यासाठी गेले. कारवाईची माहिती मिळताच काही व्यावसायिकांनी स्वतःहून आपल्या टपर्‍या हटवण्यास प्रारंभ केला. या वेळी बारटक्के चौक ते महाराणा प्रताप चौक परिसरातील रस्त्यालगत असलेल्या अनधिकृत टपर्‍या हटवण्यात आल्या. दुपारनंतर पोलीस बंदोबस्तात मार्केट यार्ड समोरील परिसरातही अतिक्रमण हटाव मोहीम राबवण्यात आली. या वेळी नगर परिषद कर्मचारी आणि दुकानदार यांच्यामध्ये वाद झाले; मात्र पोलिसांच्या उपस्थितीमध्ये कारवाई सुरळीतपणे पार पडली.