जेजुरीतील रसायनयुक्त भंडार्‍याच्या विक्रीविरुद्ध भाजप आमदार विक्रम पाचपुते आक्रमक !

पुणे – जेजुरी गडावर भंडार्‍याला अचानक आग लागल्याची घटना नुकतीच समोर आली होती. या घटनेचा दाखला देत भाजपचे आमदार विक्रम पाचपुते यांनी भंडार्‍यातील रासायनिक भेसळीवर बोट ठेवले आहे. जेजुरी गडासह राज्यातील विविध प्रमुख देवस्थानांच्या ठिकाणी मोठ्या प्रमाणावर रसायनयुक्त भंडार्‍याची विक्री होत असल्याचा प्रकार समोर आला आहे. हे संकट भाविकांच्या सुरक्षेला आव्हान ठरत असल्यामुळे आमदार पाचपुते यांनी अन्न व औषध प्रशासनाचे आयुक्त तुकाराम मुंढे यांची भेट घेतली आणि त्यांना एक विशेष निवेदन दिले. ‘भंडारा म्हणजे शुद्ध हळद’ म्हणून घोषित करा, अशी मागणी आमदारांनी यावेळी केली. याला आयुक्तांनी सकारात्मक प्रतिसाद देत ‘येत्या काही दिवसांत ‘भंडारा म्हणजेच हळद’ हे कायद्यामध्ये अधोरेखित करू, असे स्पष्ट आश्‍वासन त्यांनी आमदारांना दिले. अन्न व औषध प्रशासनाच्या वतीने लवकरच या संदर्भात एक अधिकृत परिपत्रक काढले जाण्याची शक्यता आहे.

आमदार पाचपुते यांनी मांडलेली सूत्रे !

१. अलीकडच्या काळात भंडार्‍यात मोठ्या प्रमाणावर मिश्रण (भेसळ) केले जात आहे. याचा थेट तोटा निष्पाप भाविकांना होत असून आमच्या धार्मिक श्रद्धेवरही याचा वाईट परिणाम होत आहे.

२. पूर्वीपासून भंडारा म्हणून शुद्ध हळदच विकली जात होती आणि पुढेही हळदच भंडारा म्हणून विकली गेली पाहिजे, या विचारधारेचे आम्ही सर्वजण आहोत. म्हणूनच लवकरात लवकर ‘भंडारा म्हणजे हळदच’ हे कायद्यामध्ये नमूद करणे अत्यंत आवश्यक आहे.