‘शिवसृष्टी दर्शन’ उपक्रमातून शिवकालीन गड-दुर्ग आणि ऐतिहासिक वास्तूचा प्रचार-प्रसार व्हावा ! – युवा इतिहास अभ्यासक अमोल वैद्य

पुणे – छत्रपती शिवाजी महाराज यांच्याप्रती आदर म्हणून आपण त्यांचा इतिहास, गड-दुर्गांची माहिती, शिवचरित्र यांचा प्रचार-प्रसार करून समाजातील अधिकाधिक लोकांपर्यंत पोचवायला हवा. शिवकालीन वास्तू, वास्तूकला आणि शिल्पकला, मंदिरे ही नुसत्या डोळ्यांनी न पहाता अभ्यासाच्या दृष्टीने पहावीत. यातून त्या काळातील लोकांची सौंदर्यदृष्टी लक्षात येते. निसर्गातील प्रतिके, संरक्षणासाठी केलेली योजना दिसते. प्रत्येक शिवभक्ताने हा प्रकल्प पहावा असे मत युवा इतिहास अभ्यासक अमोल वैद्य यांनी पर्यटकांशी संवाद साधतांना मांडले. चैत्राली फाऊंडेशनकडून आंबेगाव (पुणे) येथील ‘शिवसृष्टी दर्शन’ उपक्रमाचे विनामूल्य आयोजन करण्यात आले होते. त्या प्रसंगी ते बोलत होते.

या वेळी शिवसृष्टी प्रकल्पाचे विश्वस्त श्री. गणेश पुरंदरे, अनिल वळसंगकर यांचा शाल आणि ‘शी इज’ हे पुस्तक देऊन सत्कार करण्यात आला. फाऊंडेशनच्या अध्यक्षा सुवर्णा इंदोरे अन् सक्रीय सदस्य या वेळी उपस्थित होते.