Bengal Border Fencing : बंगाल सरकारने सीमा सुरक्षा दलाला पहिल्या टप्प्यात दिली भारत-बांगलादेश सीमेवरील २७.कि.मी. भूमी !

कोलकाता (बंगाल) – बंगालचे मुख्यमंत्री शुभेंदु अधिकारी यांनी भारत-बांगलादेश सीमेवरील २७ किलोमीटर भूमी सीमा सुरक्षा दलकडे सोपवली. यावर आता कुंपण आणि सुरक्षा रचना उभारली जाईल.

सीमा सुरक्षा दल, पोलीस आणि प्रशासन यांच्या समन्वय बैठका पुन्हा चालू होणार !

या संदर्भात झालेल्या बैठकीत मुख्यमंत्री शुभेंदु अधिकारी म्हणाले की, हा केवळ प्रारंभ आहे. पुढे जिथेही सीमा सुरक्षेसाठी भूमीची आवश्यकता असेल, राज्य सरकार ती सीमा सुरक्षा दलाला उपलब्ध करून देईल. सीमा सुरक्षा भक्कम करण्यासाठी कुंपणाचे काम वेगाने पूर्ण करणे आवश्यक आहे. मागील तृणमूल काँग्रेस सरकारने मतपेढीचे राजकारण आणि लांगूलचालन यांमुळे सीमा सुरक्षा दलाला भूमी दिली नाही. गेल्या अनेक वर्षांपासून सीमावर्ती जिल्ह्यांमध्ये सीमा सुरक्षा दल, राज्य पोलीस आणि जिल्हा प्रशासन यांच्यात समन्वय बैठका होत नव्हत्या. आता या बैठका पुन्हा चालू करण्यात आल्या असून पुढे त्या नियमितपणे होतील.

या वेळी सीमा सुरक्षा दलाच्या अधिकार्‍यांनी सांगितले की, राज्याच्या २ सहस्र २०० किलोमीटर लांब आंतरराष्ट्रीय सीमेपैकी अनुमाने १ सहस्र ६०० किलोमीटर भागावर कुंपण घालण्यात आले आहे, तर अनुमाने ६०० किलोमीटर सीमा अजूनही कुंपणाविना आहे.