पंढरपूर येथील श्री विठ्ठल-रुक्मिणी मंदिर परिसरातील दर्शन मंडपात आढळल्या मद्याच्या बाटल्या आणि सिगारेटची पाकिटे !

पंढरपूर – लाखो वारकरी-भाविक यांचे श्रद्धास्थान असलेल्या श्री विठ्ठल-रुक्मिणी मंदिर परिसरात भाविकांसाठी उभारण्यात आलेल्या दर्शन मंडपाच्या स्वच्छतागृहात मद्याच्या बाटल्या, मावा-गुटखा यांच्या पुड्या आणि सिगारेटची पाकिटे आढळून आली आहेत. भाजपचे माजी शहराध्यक्ष विक्रम शिरसट यांनी हा प्रकार उघडकीस आणला असून या प्रकरणी सखोल अन्वेषण करून कठोर कारवाई करण्याची मागणी केली आहे. ७ मजली दर्शन मंडपाच्या स्वच्छतेचे दायित्व ‘बी.व्ही.जी.’ आस्थापन आणि मंदिर समिती दोघांकडे असून या दोघांच्या निष्काळजीपणामुळे भाविकांमध्ये संताप उसळला आहे. (अशा पवित्र ठिकाणी मद्याच्या बाटल्या, मावा-गुटखा यांच्या पुड्या आणि सिगारेटची पाकिटे आढळणे अत्यंत गंभीर असून संबंधितांवर तात्काळ कारवाई होणे अपेक्षित आहे ! – संपादक)