जर्मनीतील ‘श्री विठ्ठलधाम’मध्ये संतश्रेष्ठ श्री ज्ञानेश्वर महाराज आणि जगद्गुरु संत तुकाराम महाराज यांच्या मूर्तींचा प्राणप्रतिष्ठा सोहळा !

आळंदी (पुणे) – संतश्रेष्ठ श्री ज्ञानेश्वर महाराज यांच्या ७५० व्या जयंती वर्षानिमित्त, तसेच जगद्गुरु श्री संत तुकाराम महाराज यांच्या ४५० व्या वैकुंठगमन सोहळ्यानिमित्त जर्मनीतील ख्रिसचेम येथील ‘श्री विठ्ठलधाम’ मंदिरात दोन्ही संतांच्या मूर्तींचा प्राणप्रतिष्ठा सोहळा होणार आहे. अक्षय्य तृतीयेच्या शुभ मुहूर्तावर म्हणजेच १९ एप्रिल या दिवशी हा ऐतिहासिक सोहळा पार पडणार आहे.

देहू आणि आळंदी येथून संस्थानचे विश्वस्त अन् वारकरी १६ एप्रिलला जर्मनीला रवाना होतील. या निमित्ताने श्री विठ्ठलधाम, ख्रिसचेम जर्मनी येथील श्री भगवान विठ्ठलाच्या मंदिरात भजन, कीर्तन प्रवचन आणि ‘नमो ज्ञानेश्वरा’ कार्यक्रम होणार आहेत. १९ एप्रिलला सकाळी १० ते दुपारी १२ या वेळेत ‘श्री ज्ञानेश्वर महाराज संस्थान कमिटी’च्या आळंदीचे प्रमुख विश्वस्तांचे कीर्तन, भारूडकार डॉ. भावार्थ रामचंद्र देखणे यांचे इंग्रजीमधून कीर्तन होणार आहे. त्यानंतर दुपारी १२ ते १२.३० वाजता संतश्रेष्ठ श्री ज्ञानेश्वर महाराज आणि जगद्गुरु संत तुकाराम यांच्या मूर्तींचा प्राणप्रतिष्ठा सोहळा होईल.