Amarnath Yatra : अमरनाथ यात्रेला  ३ जुलैपासून प्रारंभ !

श्रीनगर (जम्म-काश्मीर) – यंदाच्या वर्षातील अमरनाथ यात्रेला ३ जुलैपासून आरंभ होणार आहे. यात्रेसाठीची नोंदणी १५ एप्रिलपासून चालू होईल. यंदा ही यात्रा २८ ऑगस्टपर्यंत असेल, अशी माहिती जम्मू-काश्मीरचे उपराज्यपाल मनोज सिन्हा यांनी दिली. जम्मू येथील भगवतीनगर बेस कॅम्पमधून यात्रेकरूंचा पहिला गट मार्गस्थ होईल. एकूण ५७ दिवस चालणार्‍या या यात्रेसाठी अनंतनाग येथून पारंपरिक ४८ किमी लांबीचा नुनवान-पहलगाम मार्ग, तसेच गांदरबल येथून १४ किमी लांबीचा बालटाल मार्ग उपलब्ध आहे.

अशा प्रकारे करता येणार नोंदणी !

१. १३ ते ७० वर्षे वयोगटातील लोक ही यात्रा करू शकतात.

२. देशभरातील ५५६ निश्चित बँक शाखांमधून यात्रेसाठी नोंदणी करता येईल.

३. यासमवेतच ‘श्री अमरनाथजी श्राईन बोर्डा’च्या अधिकृत संकेतस्थळाद्वारेही ऑनलाईन नोंदणी करता येईल.

४. नोंदणीसाठी ‘येस बँक’, ‘आयसीआयसीआय बँक’, ‘पंजाब नॅशनल बँक’, ‘स्टेट बँक ऑफ इंडिया’ आणि ‘ॲक्सिस बँक’ यांच्या शाखांमध्ये यात्रेचे नोंदणी अर्ज उपलब्ध असतील.