नोएडा (उत्तरप्रदेश) येथे वेतनवाढीसाठी आंदोलन करणारे कर्मचारी हिंसक : दगडफेक आणि जाळपोळ

नोएडा (उत्तरप्रदेश) – देहलीच्या सीमेवर असणार्‍या नोएडा येथे वेतनवाढीच्या मागणीसाठी आंदोलन करणार्‍या येथील कारखान्यांतील कर्मचार्‍यांचे आंदोलन १३ एप्रिलला हिंसक झाले. कर्मचार्‍यांनी दगडफेक केली, तसेच अनेक वाहने आणि बसगाड्या यांना आग लावली. पोलिसांनी त्यांना अडवण्याचा प्रयत्न केल्यावर आंदोलक कर्मचार्‍यांनी पोलिसांची गाडी उलटवली. त्यांनी पोलिसांवरही दगडफेक केली. यामुळे पोलिसांनी त्यांच्यावर अश्रूधुराच्या नळकांड्या फोडल्या. ही घटना नोएडा फेज-२ मध्ये घडली. हा परिसर औद्योगिक क्षेत्र आहे. येथे मदरसन, ऋचा ग्लोबल, रेनबो, पॅरामाउंट, एसएनडी आदी आस्थापनांचे ५०० हून अधिक कर्मचारी गेल्या ३ दिवसांपासून वेतनवाढीसाठी आंदोलन करत आहेत.