सातारा ‘रिंगरोड’ची सिद्धता चालू ! – शिवेंद्रसिंहराजे भोसले, सार्वजनिक बांधकाममंत्री

सातारा, २८ मार्च (वार्ता.) – सातारा शहरातून जाणार्‍या प्रस्तावित ‘रिंगरोड’चे (शहराभोवती वर्तुळाकार पद्धतीने बांधलेला रस्ता) रेखांकन पूर्ण झाले असून प्रशासकीय पातळीवर या कामाची सिद्धता चालू झाली आहे. रिंगरोडसाठी आवश्यक जागेच्या भूसंपादनाचे उत्तरदायित्व सातारा नगर परिषदेचे आहे. या कामासाठी अनुमाने २० कोटी रुपये व्यय होणार आहेत; मात्र यामुळे कास, बामनोली, ठोसेघर या ठिकाणी जाणार्‍या पर्यटकांची वाहतूक कोंडीतून कायमची सुटका होणार आहे, अशी माहिती सार्वजनिक बांधकाम मंत्री शिवेंद्रसिंहराजे भोसले यांनी पत्रकार परिषदेमध्ये दिली. शासकीय विश्रामगृहामध्ये नुकत्याच आयोजित पत्रकार परिषदेमध्ये ते बोलत होते.

मंत्री भोसले म्हणाले, ‘‘ हा रिंगरोड शाहूनगरमार्गे अजिंक्यतारा, आदालत वाड्याची पाठीमागची बाजू येथून पावर हाऊस आणि महादरे, पेढ्याचा भैरोबामार्गे मेढ्याच्या जुन्या रस्त्याला जोडला जाईल. रिंगरोडचे संपूर्ण काम सार्वजनिक बांधकाम विभागाच्या वतीने करण्यात येईल.’’