श्री विठ्ठल-रुक्मिणी मंदिरात रामनवमी उत्साहात साजरी !

पंढरपूर – येथील श्री विठ्ठल-रुक्मिणी मंदिरातील विठ्ठल सभामंडपात रामनवमीनिमित्त श्रीराम जन्मोत्सव मोठ्या उत्साहात सकाळी १० ते दुपारी १२ या वेळेत साजरा करण्यात आला. सकाळी ११ वाजता श्री विठ्ठलास महानैवेद्य अर्पण करून पांढरा पोशाख, पागोटे आणि साखरेचा हार घालून श्रींच्या अंगावर गुलाल उधळण्यात आला. दुपारी १२ वाजता रामजन्मोत्सव साजरा करण्यात आला, अशी माहिती कार्यकारी अधिकारी राजेंद्र शेळके यांनी दिली.

या वेळी श्री विठ्ठल महाराज देहूकर फड (बिद्रीकर मंडळी) यांच्या वतीने ह.भ.प. श्रीकांत महाराज पातकर यांचे कीर्तन झाले. कीर्तनानंतर भाविकांना सुंठवड्याचा प्रसाद वाटप करण्यात आला. मंदिर समितीच्या सदस्या शकुंतला नडगिरे, सदस्य संभाजी शिंदे, कार्यकारी अधिकारी राजेंद्र शेळके, प्रबंधक संदेश भोसले, लेखा अधिकारी मुकेश अनेचा आदींसह कर्मचारी उपस्थित होते. त्या वेळी रामनवमीनिमित्त संत तुकाराम भवन येथील अन्नछत्रात भोजनप्रसादात गोड पदार्थाचा समावेश करण्यात आला होता. सुमारे २ सहस्र भाविकांनी या प्रसादाचा लाभ घेतल्याची माहिती प्रबंधक संदेश भोसले यांनी दिली.