चिंचवड येथे हिंदु नववर्षानिमित्त भव्य शोभायात्रा उत्साहात पार पडली !

चिंचवड (जिल्हा पुणे) – हिंदु नववर्ष आणि गुढीपाडव्यानिमित्त चिंचवड येथे भव्य शोभायात्रेचे आयोजन करण्यात आले होते. या शोभायात्रेत राष्ट्रसेविका समिती, सनातन संस्था, शंकर महाराज सेवा मंडळ, प्रजापती ब्रह्मकुमारी, जीवन विद्या मिशन, विवेकानंद केंद्र यांसह विविध भजनी मंडळे, सामाजिक संस्था आणि गणेशोत्सव मंडळे यांचे कार्यकर्ते मोठ्या संख्येने सहभागी झाले होते. श्रीधरनगर येथील दत्तमंदिर येथे धर्मग्रंथ पूजन आणि आरती करून सायंकाळी ५.३० वाजता शोभायात्रेला भावपूर्ण वातावरणात प्रारंभ झाला.

शोभायात्रेत प्रभु श्रीरामाची प्रतिमा असलेला सुशोभित रथ आणि विविध पारंपरिक वेशभूषेतील मुले अन् नागरिक आकर्षणाचे केंद्र ठरले होते. मार्गवर ठिकठिकाणी पुष्पवृष्टी करून शोभायात्रेचे स्वागत करण्यात आले. श्री धनेश्वर मंदिर येथे आरतीने सांगता झाली. आयोजक श्री. अजित जगताप यांनी उपस्थितांचे आभार मानले. या वेळी शिस्तबद्ध नियोजनासाठी पोलिसांचे विशेष सहकार्य  लाभल्याचे नमूद करत त्यांचा सत्कारही करण्यात आला.