‘विश्वचषक’ श्री सिद्धिविनायकाच्या चरणी ठेवून भारतीय संघाचे कर्णधार आणि प्रशिक्षक यांनी घेतला आशीर्वाद !

मुंबई – भारतीय क्रिकेट संघाने न्यूझीलंड संघाला पराभूत करून नुकताच ‘टी-२०’ क्रिकेट स्पर्धेमध्ये विश्वचषक जिंकला. १४ मार्च या दिवशी भारतीय क्रिकेट संघाचे कर्णधार सूर्यकुमार यादव आणि प्रशिक्षक गौतम गंभीर यांनी श्री सिद्धिविनायक मंदिरामध्ये येऊन ‘विश्वचषक’ श्री गणेशाच्या चरणी ठेवून आशीर्वाद घेतला.

या वेळी पुरोहितांनी वेदपठण करत ‘विश्वचषक’ श्री गणेशाच्या चरणी अर्पण करून आशीर्वादरूपी शाल, पुष्पहार आणि प्रसाद त्यांना दिला. या वेळी उपस्थित भाविकांनी ‘गणपति बाप्पा मोरया’ असा जयघोष आणि ‘भारतमाता की जय’ असा घोष केला.

श्री सिद्धिविनायक गणपति मंदिर न्यासाचे कोषाध्यक्ष आचार्य पवन त्रिपाठी, कार्यकारी अधिकारी वीणा पाटील, उपकार्यकारी अधिकारी डॉ. संदीप राठोड यांसह अन्य पदाधिकार्‍यांनी त्यांचा सन्मान केला.