जर्मनीतील ‘श्री विठ्ठलधाम’मध्ये संतश्रेष्ठ श्री ज्ञानेश्वर महाराज आणि जगद्गुरु संत तुकाराम महाराज यांच्या मूर्तींची होणार प्राणप्रतिष्ठा !

आळंदीतून माऊलींची मूर्ती जर्मनीकडे रवाना

सातासमुद्रापार दुमदुमणार ‘ग्यानबा-तुकाराम’चा गजर !

आळंदी (जिल्हा पुणे) – जर्मनीतील ‘श्री विठ्ठलधाम, ख्रिसचेम’ येथील विठ्ठल मंदिरात संतश्रेष्ठ श्री ज्ञानेश्वर महाराज आणि जगद्गुरु संत तुकाराम महाराज यांच्या मूर्तींची प्रतिष्ठापना करण्यात येणार आहे. त्यांपैकी माऊलींची मूर्ती १० फेब्रुवारी या दिवशी राजस्थानहून जर्मनीकडे रवाना झाली आहे. या दोन्ही संतांचे कार्य जगभरात पोचण्यासाठी हे महत्त्वाचे पाऊल मानले जाते. संतश्रेष्ठ श्री ज्ञानेश्वर महाराजांचे ७५० वे जयंती वर्ष आणि जगद्गुरु संत तुकाराम महाराज यांचा ४५० वा वैकुंठगमन सोहळा यांचे औचित्य साधून हा स्तुत्य उपक्रम हाती घेण्यात आला आहे.

भागवत धर्माची परदेशी भक्तांना होणार ओळख !

भागवत धर्माचा जगभर प्रचार आणि प्रसार व्हावा या हेतूने देहू आणि आळंदी संस्थानने या मूर्ती जर्मनीतील मंदिराला भेट देण्याचे ठरवले होते. याकामी स्वामी समर्थ प्रतिष्ठानचे (औंध) श्रीकांत पाटील यांनी आळंदी-देहू संस्थान आणि जर्मनीतील मंदिर प्रशासन यांच्यात यशस्वी समन्वय साधला. जर्मनीतील या विठ्ठल मंदिराला प्रतिवर्षी सहस्रो परदेशी नागरिक भेट देतात. तिथे या मूर्तीची स्थापना झाल्यामुळे परदेशी भक्तांना दोन्ही संतांच्या आध्यात्मिक कार्याची ओळख होईल.