Indian Fisherman Died : पाकिस्तानातील कारागृहात भारतीय मासेमाराचा मृत्यू

रुग्णालयात लोखंडी साखळ्यांनी बांधून छळ

जुनागड (गुजरात) – पाकिस्तानी कारागृहे भारतीय मासेमारांसाठी मृत्यूचे सापळे बनले आहेत. पाकिस्तानातील कराची येथील कारागृहात बंदीवान असलेल्या भारतीय मासेमाराचा मृत्यू झाल्याने मोठी खळबळ उडाली आहे. भागाभाई बामनिया असे या मासेमाराचे नाव असून ते गुजरातमधील गिर सोमनाथ जिल्ह्यातील चिखली गावाचे रहिवासी होते. भागाभाई बामनिया कारागृहात अचानक आजारी पडले होते. त्यानंतर त्यांना उपचारासाठी कराचीतील रुग्णालयात भरती करण्यात आले होते. तेथे नुकतेच त्यांचे निधन झाले. पाकिस्तानी रुग्णालयात भारतीय रुग्णांना जनावरांपेक्षाही वाईट वागणूक दिली जाते. याविषयीचा एक व्हिडिओ प्रसारित झाला आहे, ज्यामध्ये कराची रुग्णालयात उपचारासाठी नेलेल्या भागाभाई यांना लोखंडी साखळ्यांनी बांधण्यात आल्याचे दिसून येते. या व्हिडिओनंतर भागाभाई यांच्या कुटुंबांने पाकिस्तानविरुद्ध प्रचंड संताप व्यक्त केला आहे.

मृत भागाभाई बामनिया यांचे १८ फेब्रुवारी २०२२ या दिवशी पाकिस्तानी सुरक्षा यंत्रणांनी त्यांच्या ‘बुराक’ या नौकेसह अपहरण केले होते. ‘समुद्र सुरक्षा श्रमिक संघा’चे अध्यक्ष बाळूभाई सोच यांनी पाकिस्तानी अधिकार्‍यांवर अमानवी वागणूक आणि मानवी हक्कांचे उल्लंघन केल्याचा थेट आरोप केला आहे. पाकिस्तानी सुरक्षायंत्रणांनी सीमेवरून अपहरण केलेले जवळजवळ २०० भारतीय मासेमार अजूनही पाकिस्तानी कारागृहात आहेत.