कोरोनाकाळापासून पुणे विभागाने ‘एस्टी’च्या १०७ फेर्‍या बंद केल्याने प्रवाशांची गैरसोय !

पुणे – महाराष्ट्र राज्य मार्ग परिवहन महामंडळाचे पुणे विभागात एकूण १४ आगार असून ८५० बसगाड्या आहेत. पुणे विभागात बसगाड्यांच्या प्रतिदिन ३ सहस्र ४०० फेर्‍या होतात. विभागाचे प्रतिदिन उत्पन्न सवलतींविना १.२५ कोटी तर सवलतींसह २ कोटी रूपये आहे. कोरोना महामारी नंतर प्रवाशांचा घटलेला प्रतिसाद आणि बसगाड्यांची कमी झालेली संख्या यामुळे पुणे विभागात बसगाड्यांच्या १०७ फेर्‍या बंद करण्यात आल्या आहेत. यामुळे एस्टी वेळेत न मिळणे, एस्टीसाठी वाट पहावी लागणे, बसायला जागा न मिळणे, गर्दी असलेल्या बसमधून प्रवास करणे, खाजगी वाहनातून धोकादायक स्थितीत प्रवास करणे, अशा त्रासाला प्रवाशांना सामोरे जावे लागत आहे. त्यामुळे प्रतिदिन प्रवास करणार्‍या सरासरी १ लाख ६० सहस्र प्रवाशांची गैरसोय होत आहे. बंद झालेल्या फेर्‍यांमध्ये शटलसेवा, मध्यम पल्ल्याच्या, लांब पल्ल्याच्या आणि विनावाहक बससेवांचा समावेश आहे.