वसुबारसेला रायगड उजळला !

पनवेल – दीपावलीच्या पार्श्वभूमीवर वसुबारसेला रायगडावर छत्रपती शिवाजी महाराजांना पहिला दिवा अर्पण करत गडप्रेमींनी दिवाळीचा आरंभ केला. ‘दुर्गराज रायगड’ या संस्थेच्या वतीने सलग १३ व्या वर्षी दिवाळीच्या पहिल्या दिवशी रायगडावर ‘शिवचैतन्य सोहळा’ साजरा केला गेला. राज पुरोहित श्री. जंगम यांच्या मंत्रोपचाराने गडदेवता श्री शिरकाई, श्री जगदीश्वर आणि हिंदवी स्वराज्याच्या सार्वभौम सिंहासनाचे पूजन करण्यात आले. संस्थेचे संस्थापक सदस्य श्री. संजय ढमाळ यांनी यजमान म्हणून पूजन केले. या वेळी छत्रपतींची पालखी मिरवणूकही काढण्यात आली. या वेळी तलवारबाजी अणि लाठी-काठी यांचे चित्तथरारक सादरीकरण करण्यात आले. शिवभक्त पारंपरिक वेशभूषेत उपस्थित होते. रायगडावरील प्रमुख ठिकाणी रांगोळ्या, रोषणाई, सजावट इत्यादी करण्यात आले होते.