Delhi Doctor Murder : देहलीत अल्‍पवयीन मुलांकडून डॉक्‍टरची गोळ्‍या झाडून हत्‍या !

नवी देहली – देहलीतील कालिंदी कुंज येथील जैतपूर भागातील नीमा रुग्‍णालयामध्‍ये एका ५५ वर्षीय डॉक्‍टरची २ अल्‍पवयीन मुलांनी गोळ्‍या झाडून हत्‍या केली. युनानी डॉक्‍टर जावेद अख्‍तर असे मृताचे नाव आहे. घटनेनंतर दोन्‍ही आरोपी पसार झाले. पोलिसांकडून त्‍यांचा शोध घेतला जात आहे. (हे देहली पोलीस आणि प्रशासन यांना लज्‍जास्‍पद ! – संपादक)

रुग्‍णालयातील कर्मचार्‍यांनी दिलेल्‍या माहितीनुसार, दोन्‍ही आरोपींचे वय १६-१७ वर्षांचे आहे. एका आरोपीवर १ ऑक्‍टोबर या दिवशी पायाच्‍या दुखापतीवर उपचार करण्‍यात आले होते. २ ऑक्‍टोबरला तो रुग्‍ण रात्री उशिरा दुसर्‍या एका मुलाला घेऊन रुग्‍णालयात पोचला. प्रिस्‍क्रिप्‍शनची आवश्‍यकता असल्‍याचे सांगून दोन्‍ही आरोपी डॉक्‍टर जावेद यांना भेटायला त्‍यांच्‍या केबिनमध्‍ये गेले. तेथे डॉक्‍टरवर गोळ्‍या झाडून आरोपी पळून गेले. या घटनेची माहिती मिळताच पोलीस घटनास्‍थळी पोचले. या प्रकरणी अन्‍वेषण चालू असल्‍याचे पोलिसांनी सांगितले.