‘माऊली’च्या जयघोषात चांदोबाचा लिंब येथे संतश्रेष्ठ ज्ञानेश्वर माऊलींच्या पालखीचा पहिला रिंगण सोहळा!

सातारा – चांदोबाचा लिंब येथे ८ जुलैला ‘माऊली’च्या जयघोषात संतश्रेष्ठ ज्ञानेश्वर महाराज पालखीचा पहिला रिंगण सोहळा सहस्रो वारकर्‍यांच्या उपस्थितीत पार पडला. माऊलींच्या रथाजवळ अश्व आल्यावर सोहळाप्रमुखांनी अश्वास पुष्पहार घालून खारीक-खोबर्‍याचा नेवैद्य दाखवला. यानंतर अश्वाने दौड घेतली. पुढे माऊलींचा अश्व आणि मागे स्वारींचा अश्व अशी दौड पूर्ण झाली. अश्व दौडत सोहळ्याच्या मुख्य स्थानी पोचताच चोपदारांनी रथावर उभे राहून हातातील दंडाने रिंगण पूर्ण झाल्याचे दर्शवले. यानंतर माऊलींचा गजर करत सोहळा पुढे मार्गस्थ झाला.