‘सनातन प्रभात’ हे आंतरिक परिवर्तनाचे माध्यम ! – योगेश जलतारे, समूह संपादक, ‘सनातन प्रभात’ नियतकालिक

‘सनातन प्रभात’च्या समूह संपादकपदी श्री. योगेश जलतारे यांची नियुक्ती !

रामनाथी, ९ एप्रिल (वार्ता.) : ‘सनातन प्रभात’ हे आंतरिक परिवर्तनाचे उत्तम माध्यम आहे, असे प्रतिपादन ‘सनातन प्रभात’चे नवनिर्वाचित समूह संपादक श्री. योगेश जलतारे यांनी केले. गुढीपाडव्याच्या शुभमुहूर्तावर ‘सनातन प्रभात’च्या समूह संपादकपदी नियुक्ती करण्यात आल्यानंतर ते बोलत होते. गुरुकृपेने मिळालेल्या या सेवेच्या माध्यमातून ‘सनातन प्रभात’चे राष्ट्ररक्षण आणि धर्मजागृतीचे कार्य उत्तरोत्तर वाढवण्यावर भर देणार असल्याचेही त्यांनी नमूद केले.

येथील ‘सनातन प्रभात’च्या कार्यालयात आयोजित केलेल्या कार्यक्रमात ‘सनातन प्रभात’चे मावळते समूह संपादक श्री. नागेश गाडे यांनी श्री. जलतारे यांच्याकडे ‘सनातन प्रभात’चे समूह संपादक म्हणून पदभार सुपुर्द केला आणि शुभेच्छा दिल्या. या वेळी ‘सनातन प्रभात’चे माजी समूह संपादक पू. पृथ्वीराज हजारे यांनीही श्री. जलतारे यांचे अभिनंदन केले आणि शुभेच्छा दिल्या. या प्रसंगी ‘सनातन प्रभात’ची सेवा करणारे साधक उपस्थित होते.