India Myanmar Border : भारत-म्यानमार सीमा बंद करण्याच्या केंद्रशासनाच्या निर्णयाला ईशान्य राज्यांकडून विरोध !

नवी देहली – ईशान्य भारतातील ४ राज्यांना म्यानमारची सीमा लागलेली असून ती बंद करण्याचा निर्णय केंद्र सरकारने नुकताच घेतला. यामुळे गेल्या ६ वर्षांपासून चालत आलेली ‘फ्री मूव्हमेंट रेजीम’ (दोन्ही देशांतील सीमेलगत १६ कि.मी. अंतरापर्यंत विना विजा प्रवास करता येण्याची सुविधा) रहित करण्यात आली आहे. मणीपूरमध्ये गेल्या वर्षी पेटलेल्या हिंसाचाराला म्यानमारमधून खतपाणी घातले गेले होते. खुल्या सीमेतून शस्त्रास्त्रे आणि अमली पदार्थ यांची तस्करी केली जात होती. त्यामुळे सरकारने हा निर्णय घेतला. याला आता ईशान्येतील राज्यांकडून विरोध होऊ लागला आहे. सरकारच्या निर्णयामुळे पर्वत आणि दर्‍या यांचे २ भाग झाले आहेत. खोर्‍यातील लोक आनंदी असले, तरी डोंगराळ भागांतील लोकांचा यास विरोध आहे. मिझोराम आणि नागालँड या राज्यांच्या मुख्यमंत्र्यांनीही यास विरोध दर्शवला आहे.

मिझोराममधील अनेक संघटना या निर्णयाच्या विरोधात मोठे आंदोलन करण्याच्या सिद्धतेत आहेत. अनेक ठिकाणी सीमेच्या दोन्ही बाजूला लोकांची घरे आहेत. मणीपूरच्या सीमावर्ती भागात रहाणार्‍या लोकांच्या मते, सीमा बंद केल्याने मानवतावादी संकट निर्माण होईल. शतकानुशतके त्यांचे रक्ताचे नाते आहे. प्रत्येक सुख-दु:खात येणे-जाणे असते. अनेक ठिकाणी सीमेच्या दोन्ही बाजूंना लोकांची घरे आहेत. तेथे कोणतेही स्पष्ट विभाजन नाही. अशा स्थितीत व्यावहारिक अडचणीही निर्माण होतील.