सिंधुदुर्ग : अरुणा धरणाचे काम प्रकल्पग्रस्तांनी रोखले

प्रशासनाकडून आश्वासनांची पूर्तता होत नसल्याचा आरोप

वैभववाडी (सिंधुदुर्ग) – जोपर्यंत प्रकल्पग्रस्तांचे पुनर्वसन केले जात नाही आणि  प्रशासनाकडून दिलेल्या आश्वासनांची पूर्तता केली जात नाही, तोपर्यंत येथे काम करू देणार नाही, असे सांगत संतप्त झालेल्या अरुणा प्रकल्पग्रस्तांनी ५ फेब्रुवारी या दिवशी येथे चालू केलेले अरुणा धरणाच्या कालव्याचे आणि अन्य कामे बंद पाडली.

अरुणा मध्यम पाटबंधारे प्रकल्पग्रस्तांपैकी आखवणे येथील १६५ प्रकल्पग्रस्तांचे हेत किंजळीचा माळ येथे शासनाने पुनर्वसन केले आहे; मात्र तेथे पुनर्वसनाच्या अनुषंगाने कोणतीही कामे गेल्या ५ वर्षांत केलेली नाहीत. पुनर्वसन गावठाणासाठी स्वतंत्र विहीर खोदण्याचे आश्वासन पाटबंधारे विभागाकडून देण्यात आले आहे; मात्र यावरही अद्याप कोणतीच कारवाई करण्यात आली नाही. नळपाणी पुरवठा योजनेत वारंवार होणार्‍या बिघाडामुळे धरणग्रस्तांना पाणीटंचाईला सामोरे जावे लागत आहे. गेले ८ दिवस पुनर्वसन गावठाणातील नळयोजनेला पाणी आलेले नाही. पात्र लाभार्थ्यांना अद्याप भूखंड मिळालेले नाहीत, अशा अनेक मागण्या आहेत; मात्र त्यावर अद्याप कोणतीच कार्यवाही नाही, असे ग्रामस्थांचे म्हणणे आहे. ‘जोपर्यंत आमच्या मागण्या पूर्ण केल्या जात नाहीत, तोपर्यंत धरणाचे काम करू देणार नाही’, अशी चेतावणी धरणग्रस्तांनी दिली आहे.

या वेळी माजी सरपंच सुरेश नागप, महादेव नागप, शिवाजी पडीलकर, सुनील नागप, मानाजी घाग, परशुराम पडीलकर, विनोद नागप, विजय नागप यांच्यासह किंजळीचा माळ पुनर्वसन गावठाणातील धरणग्रस्त उपस्थित होते.