प्रभु श्रीरामाप्रमाणे आदर्श आचरण करून स्वतःमध्ये रामराज्य निर्माण करूया ! – सुनील कदम, हिदु जनजागृती समिती

रायगड जिल्ह्यात विविध ठिकाणी श्रीरामनामसंकीर्तन फेरी, हिंदु राष्ट्रासाठी प्रतिज्ञा यांसह विविध उपक्रम ! 

पनवेल – प्रभु श्रीराम हे आदर्श पुत्र, आदर्श पती, आदर्श मित्र, आदर्श बंधू, तसेच आदर्श शत्रू होते. त्यांचे गुण स्वतःमध्ये आणून अंतःकरणात रामराज्य निर्माण करणे महत्त्वाचे आहे, असे प्रतिपादन हिंदु जनजागृती समितीचे श्री. सुनील कदम यांनी केले. अयोध्येतील रामललाच्या प्राणप्रतिष्ठा सोहळ्यानिमित्त खोपोली येथील तुकसई गावात त्यांच्या व्याख्यानाचे आयोजन करण्यात आले होते. त्या वेळी ते बोलत होते.

व्याख्यानाच्या शेवटी सर्वांनी हिंदु राष्ट्रासाठी प्रतिज्ञा केली. या प्रसंगी अनेक धार्मिक कार्यक्रमांचे आयोजन केले होते. अभिषेक, सामूहिक श्रीरामरक्षास्तोत्र पठण, नामजप, दिंडी सोहळा, हरिपाठ, तसेच जागर, भजन इ. कार्यक्रम या वेळी आयोजित करण्यात आले होते.

पेण येथे हिंदु जनजागृती समितीच्या वतीने श्रीराम पालखी आणि दीपोत्सव सोहळा आयोजित करण्यात आला होता. या वेळी मुलांसह हिंदू मोठ्या संख्येने सहभागी झाले होते. शेवटी हिंदु राष्ट्राची प्रतिज्ञा घेण्यात आली.

अष्टमी, रोहा येथील श्रीराममंदिरात हिंदु जनजागृती समितीच्या वतीने श्री. राजेंद्र पावसकर यांनी प्रवचन घेतले. त्यानंतर आरती करण्यात आली. या वेळी मोठ्या प्रमाणात भाविक आणि हिंदुत्वनिष्ठ उपस्थित होते.

रायगड जिल्ह्यात उरण, अलिबाग, कोलाड, खोपोली, कामोठे, पनवेल, महाड या ठिकाणी सनातन संस्था आणि हिंदु जनजागृती समितीच्या माध्यमातून श्रीराम नामसंकीर्तन, हिंदु राष्ट्र स्थापनेसाठी प्रतिज्ञा आदी राबवण्यात आलेल्या उपक्रमांना हिंदूंचा चांगला प्रतिसाद मिळाला.