राष्ट्रीय स्वयंसेवक संघाच्या ४५ प्रांतांचे पदाधिकारी भाजपच्या प्रचाराची दिशा आखणार !

भूज येथे राष्ट्रीय मंडळाची ५ नोव्हेंबरपासून बैठक !

नागपूर – लोकसभा आणि ५ राज्यांतील विधानसभा प्रचाराची दिशा ठरवण्यासाठी देशाच्या ४५ प्रांतांतील वरिष्ठ पदाधिकारी गुजरात राज्यातील भूज शहरात ३ दिवसांसाठी एकत्र येत आहेत. राष्ट्रीय स्वयंसेवक संघाच्या अखिल भारतीय कार्यकारी मंडळाची बैठक ५ ते ७ नोव्हेंबर या कालावधीत भूज येथे होईल. २२ जानेवारी या दिवशी अयोध्या येथील श्रीराम मंदिर लोकार्पण सोहळ्यासह सरसंघचालकांच्या ‘दसरा उत्सव’ भाषणातील सूत्रांच्या कार्यवाहीवर चर्चा होणार आहे. संघाचे अखिल भारतीय प्रचार प्रमुख सुनील आंबेकर यांनी ही माहिती दिली. प्रत्येक निवडणुकीत भाजपसमोरील अडचणी दूर करण्यासाठी संघाचे कार्यकर्ते सक्रीय होतात. प्रचाराची दिशा, तसेच अन्य सूत्रे वरिष्ठ स्तरावर ठरतात. ‘दसरा महोत्सवा’त प.पू. सरसंघचालक मोहन भागवत यांच्या भाषणांतील सूत्रांच्या आधारावरच ही बैठक होणार आहे.