राष्ट्रीय स्वयंसेवक संघाच्या ४५ प्रांतांचे पदाधिकारी भाजपच्या प्रचाराची दिशा आखणार !

भूज येथे राष्ट्रीय मंडळाची ५ नोव्हेंबरपासून बैठक !

नागपूर – लोकसभा आणि ५ राज्यांतील विधानसभा प्रचाराची दिशा ठरवण्यासाठी राष्ट्रीय स्वयंसेवक संघाच्या देशातील ४५ प्रांतांतील वरिष्ठ पदाधिकारी गुजरात राज्यातील भूज शहरात ३ दिवसांसाठी एकत्र येत आहेत. राष्ट्रीय स्वयंसेवक संघाच्या अखिल भारतीय कार्यकारी मंडळाची बैठक ५ ते ७ नोव्हेंबर या कालावधीत भूज (गुजरात) येथे होणार आहे. २२ जानेवारी या दिवशी अयोध्या येथील श्रीराममंदिर लोकार्पण सोहळ्यासह सरसंघचालकांच्या ‘दसरा उत्सव’ भाषणातील सूत्रांच्या कार्यवाहीवर या बैठकीत चर्चा होणार आहे. संघाचे अखिल भारतीय प्रचार प्रमुख सुनील आंबेकर यांनी ही माहिती दिली.