देवेंद्र फडणवीस यांच्या सुरक्षेत वाढ करावी ! – आशिष शेलार

मुंबई, ९ मार्च (वार्ता.) – विधानसभेचे विरोधी पक्षनेते देवेंद्र फडणवीस यांनी विधानसभेत सरकारच्या विरोधातील पुरावे सादर केले. ऑडिओ आणि व्हिडिओ क्लिपसह याविषयीचा पेनड्राईव्ह विधानसभेच्या उपाध्यक्षांना दिला; मात्र आता या सर्व गंभीर प्रकरणानंतर देवेंद्र फडणवीस यांच्या सुरक्षेत राज्य सरकारने वाढ करावी, अशी मागणी भाजपचे आमदार आशिष शेलार यांनी ९ मार्च या दिवशी विधानभवनात पत्रकारांशी बोलतांना केली.

ते पुढे म्हणाले की, फडणवीस यांनी आंतरराष्ट्रीय आतंकवादी दाऊद इब्राहिम याच्या मालमत्तेचा कटही उलगडला आहे. हा महाभयंकर कट दिसत असल्याने फडणवीस यांची सुरक्षा तात्काळ वाढवावी. फडणवीस यांनी सादर केलेले पुरावे ज्या कटाविषयी होते, त्या कटाचे सूत्रधार विशेष सरकारी अधिवक्ता प्रवीण चव्हाण आहेत. त्यांच्याशी कुणाच्या गाठीभेटी होत आहेत, कोणत्या व्यक्ती त्यांना भेटण्यासाठी त्यांच्या कार्यालयात अथवा घरी जात आहेत. यावर लक्ष ठेवणे आवश्यक आहे. एवढ्या मोठ्या गटाचे सूत्रधार चव्हाण असल्याने त्यांचीही सुरक्षा महत्त्वाची असून राज्य सरकारने चव्हाण यांनाही अधिक सुरक्षा पुरवावी.