‘पद्मश्री’ परशुराम गंगावणे यांचे कुडाळमध्ये उत्स्फूर्त स्वागत !

कुडाळ – राष्ट्रपती रामनाथ कोविंद यांच्या हस्ते ९ नोव्हेंबरला नवी देहली येथे ‘पद्मश्री पुरस्कार’ स्वीकारल्यानंतर येथील ठाकर लोककला जोपासणारे लोककलाकार ‘पद्मश्री’ परशुराम गंगावणे यांचे १३ नोव्हेंबरला कुडाळ येथे आगमन झाले. या वेळी भव्य फेरी काढून, तसेच विविध राजकीय पक्ष, सामाजिक संघटना, संस्था आणि नागरिक यांच्या वतीने ‘पद्मश्री’ गंगावणे यांचा सत्कार करण्यात आला. कुडाळ येथे आगमन झाल्यानंतर ‘पद्मश्री’ गंगावणे यांनी शहरातील ‘भारतरत्न’ डॉ. बाबासाहेब आंबेडकर यांच्या पुतळ्याला पुष्पहार अर्पण करून अभिवादन केले. त्यानंतर जिल्हा ठाकर समाज, सिंधुदुर्ग; पिंगुळी ठाकर समाज ग्रामस्थ मंडळ आणि गुढीपूर येथील आदिवासी कला आंगण यांच्या वतीने कुडाळ ते पिंगुळी अशी ढोलताशांच्या गजरात ‘पद्मश्री’ गंगावणे यांची भव्य मिरवणूक काढण्यात आली.