कर्जत-लोणावळा रेल्वेमार्गावर दरड कोसळल्यामुळे रेल्वेसेवा विस्कळीत !

पुणे – कर्जत लोणावळा रेल्वे मार्गादरम्यान दरड कोसळल्याने रेल्वेसेवा विस्कळीत झाली. त्यामुळे अनेक रेल्वेगाड्या रहित कराव्या लागल्या, तर काही रेल्वेगाड्या अर्ध्या मार्गावरून परतवण्यात आल्या. अनेक रेल्वे गाड्यांच्या वेळापत्रकात पालट केला. त्यामुळे प्रवास रहित झालेल्या ८० सहस्र प्रवाशांना मध्य रेल्वेने ५ कोटी ९१ लाख रुपयांचा परतावा तातडीने दिला आहे. गतवर्षीपेक्षा यंदा परतावा मिळालेल्या प्रवाशांच्या संख्येत ४१ सहस्र ६० जणांची वाढ झाली आहे.

मुंबई विभागात ३७ सहस्र ३३० प्रवाशांना २ कोटी ८६ लाख रुपये, पुणे विभागात २० सहस्र ९८२ प्रवाशांना १ कोटी ५६ लाख रुपये परतावा दिला आहे. परताव्याची प्रक्रिया सुरळीत पार पडावी यासाठी स्थानकावर अतिरिक्त कर्मचारी नियुक्त केले आहेत, तसेच प्रवाशांच्या तक्रारी आणि परताव्याच्या अर्जावर त्वरित कार्यवाही करण्यासाठी विशेष मदत कक्ष चालू केला आहे.