इंग्रजी आणि हिंदी वृत्तपत्र वाचनाचे विद्यार्थ्यांना आवाहन : मातृभाषाप्रेमींमध्ये संताप

पणजी, ८ जुलै (वार्ता.) – गोवा राज्य शैक्षणिक, संशोधन आणि प्रशिक्षण मंडळाने (‘एस्.सी.ई.आर्.टी.’ने – ‘स्टेट कौन्सिल ऑफ एज्युकेशन, रिसर्च आणि ट्रेनिंग’ने) विद्यार्थ्यांमध्ये वाचनाची ओढ निर्माण व्हावी, सामान्य ज्ञानात वृद्धी व्हावी, चिकित्सक विचारसरणी निर्माण व्हावी आणि विद्यार्थी जागरूक नागरिक बनावे, यासाठी राज्यातील सर्व सरकारी अन् अनुदानित शाळा यांच्यासाठी परिपत्रक प्रसारित करून त्यामध्ये दर्जेदार इंग्रजी आणि हिंदी वृत्तपत्र वाचनाचे विद्यार्थ्यांना आवाहन करण्यात आले आहे. ‘एस्.सी.ई.आर्.टी.’ने कोकणी आणि मराठी या मातृभाषांना डावलून इंग्रजी आणि हिंदी वृत्तपत्र वाचन करण्याचे आवाहन केल्याने राज्यातील मातृभाषाप्रेमींमध्ये संताप व्यक्त करण्यात येत आहे.