मंत्रालयाच्या बाहेरच राजकीय नेत्यांच्या अनधिकृत होर्डिंगजची उभारणी !

(होर्डिंग म्हणजे मोठे फलक)

श्री. प्रीतम नाचणकर, विशेष प्रतिनिधी, दैनिक ‘सनातन प्रभात’, मुंबई

मुंबई, ५ जुलै (वार्ता.) – महाराष्ट्राच्या मंत्रालयाच्या परिसरात नियमितपणे राजकीय नेत्यांचे शेकडो अनधिकृत होर्डिंग लावले जात आहेत. हे होर्डिंगज एकदा काढल्यावर दुसर्‍या दिवशी त्याच जागेवर पुन्हा दुसरे होर्डिंग लावले जातात. हा प्रकार नित्याचाच झाला आहे. त्यामुळे हे अवैध होर्डिंग्जा काढणे मुंबई महानगरपालिका प्रशासनासाठी एकप्रकारे डोकेदुखी ठरत आहे. यांत प्रशासनाचे मनुष्यबळ, वेळ आणि पैसा वाया जात आहे.

सार्वजनिक जागेत अनधिकृतपणे होर्डिंग लावल्यास कारवाई करण्याचे शासन निर्णय मंत्रालयातूनच काढले जातात; परंतु मंत्रालयाच्या प्रवेशद्वारांच्या बाहेर आणि परिसरात शेकडो होर्डिंगज लावण्यात येत आहेत. मंत्रालयाच्या बाहेर लागलेले अनधिकृत होर्डिंगज म्हणजे ‘दिव्याखाली अंधार’ अशी स्थिती आहे.

मंत्र्यांना वावगे वाटत नाही का ?

मंत्रालयाच्या मुख्य प्रवेशद्वाराच्या बाहेर रस्त्याच्या कडेला मंत्र्यांची निवासस्थाने आहेत. निवासस्थानांच्या बाहेर संरक्षक भिंतीवरही होर्डिंगज लावले जातात. राज्यभरातील राजकीय पक्षांचे अतीउत्साही कार्यकर्ते मंत्र्यांना शुभेच्छा देण्यासाठी होर्डिंगज लावतात. अशा प्रकारे अवैधरित्या होर्डिंग लावून सार्वजनिक ठिकाणे विद्रूप होऊ नयेत, याची जाणीव खरेतर मंत्र्यांना असणे अपेक्षित आहे; पण दुर्दैवाने तसे होतांना दिसत नाही. कदाचित् मंत्र्यांनी सूचना देऊनही यंत्रणेकडून कार्यवाही होत नसेल, असेही असू शकेल; परंतु अवैध होर्डिंग लागत आहेत, ही वस्तूस्थिती आहे.

स्वतःवर कारवाई होण्याच्या भीतीने पोलीसच कारवाई करण्याचे टाळतात !

मंत्रालयाच्या परिसरात लावण्यात येणारे जवळजवळ सर्वच होर्डिंग राजकीय असतात आणि ते राजकीय पदाधिकार्‍यांचे असतात. ‘होर्डिंग लावणार्‍यांना हटकल्यास स्वत:वरच कारवाई होईल’, या भीतीने पोलीस कारवाई करत नाहीत’, असे एका पोलिसाने सांगितले.