गडचिरोली येथे माओवाद्यांचा शस्त्रनिर्मितीचा कारखाना उद्ध्वस्त !

गडचिरोली – येथे माओवाद्यांनी जंगल परिसरात गुप्तपणे लपवून ठेवलेला शस्त्रनिर्मिती कारखाना गडचिरोली पोलिसांनी उद्ध्वस्त केला. शरणागती पत्करलेल्या माओवाद्यांकडून मिळालेल्या गोपनीय माहितीच्या आधारे विशेष शोधमोहीम राबवण्यात आली होती. यात मोठ्या प्रमाणात माओवादी साहित्य हस्तगत करून ते घटनास्थळीच नष्ट करण्यात आले. माओवाद्यांकडून सुरक्षादलांवर घातपात घडवून आणण्यासाठी विविध प्रकारची शस्त्रे आणि स्फोटक साहित्य जंगल परिसरात भूमीत पुरून ठेवण्यात येत होते. नक्षल सप्ताह, निवडणुका आणि इतर संवेदनशील काळ यांत या साहित्याचा वापर करण्याचा कट होता, असे अन्वेषणात उघड झाले आहे.