ब्राझीलच्या प्राध्यापकांनी गिरवले संस्कृतचे धडे !

पुणे – संस्कृतमधील बौद्ध ग्रंथ समजून घेण्यासाठी अभ्यासक्रम शोधत असतांना ब्राझिलमधील एका प्राध्यापकांचा संपर्क ‘संस्कृत सेवा फाऊंडेशन’शी आला. त्यांनी ‘संस्कृत सेवा फाऊंडेशन’च्या ‘भाषाङ्कुरः’ (स्तर १) या अभ्यासक्रमात प्रवेश घेतला. अवघ्या ६ महिन्यांत त्यांनी संस्कृत श्लोक योग्य पद्धतीने म्हणणे, शब्दांचे विभाजन (पदच्छेद) करणे इत्यादी मूलभूत कौशल्ये आत्मसात् केली. अभ्यासक्रमाच्या शेवटी घेण्यात आलेल्या बहुपर्यायी प्रश्नांच्या (एम्.सी.क्यू.) परीक्षेत पात्र ठरलेल्या ५ विद्यार्थ्यांपैकी ते एक आहेत.

या स्तराच्या दुसर्‍या तुकडीमधील यशस्वी विद्यार्थ्यांचा सत्कार समारंभ १५ मार्चला होणार आहे. या कार्यक्रमात प्रथम आलेल्या विद्यार्थ्याला विशेष स्मृतीचिन्ह म्हणून ताम्रपट प्रदान करून गौरवण्यात येणार आहे, असे ‘फाऊंडेशन’चे सहसंस्थापक डॉ. रोहन कुलकर्णी यांनी सांगितले.