मंत्र्यांनी आवाज चढवून बोलणे संसदीय लोकशाहीसाठी अशोभनीय ! – सभापती गावकर

सत्ताधारी पक्षातील मंत्र्यांनाच सभापतींनी असे सांगावे लागणे दुर्दैवी !

पणजी, १० मार्च (वार्ता.) – गोवा विधानसभेच्या सध्या चालू असलेल्या अर्थसंकल्पीय अधिवेशनाच्या तिसर्‍या दिवशी सभापती डॉ. गणेश गावकर यांनी मंत्र्यांनी ९ मार्च या दिवशी सभागृहात केलेल्या वर्तनाविषयी अप्रसन्नता व्यक्त केली आणि असे यापुढे न करण्याची मंत्र्यांना चेतावणीही दिली.

अधिवेशनात १० मार्च या दिवशी सकाळी ११.३० वाजता कामकाजाला प्रारंभ होताच सभापती डॉ. गणेश गावकर म्हणाले, ‘‘सभागृहात मंत्र्यांकडून सातत्याने आवाज चढवून बोलणे, समोरच्या सदस्याला टोमणे मारणे, उपहासात्मक बोलणे आणि वैयक्तिक पातळीवर आरोप करणे, असे प्रकार वाढले आहेत. हे वर्तन संसदीय लोकशाहीला शोभणारे नाही. हे वर्तन पूर्णपणे अनैतिक आहे.’’ सभापती डॉ. गणेश गावकर यांनी या वेळी राज्यघटनेच्या तिसर्‍या अनुसूचीचा उल्लेख करत मंत्र्यांना त्यांच्या शपथेची आठवण करून दिली. ते पुढे म्हणाले, ‘‘सभागृहात सदस्यांना उद्देशून केलेली आरडाओरड आणि वैयक्तिक टीका शपथेच्या पूर्णपणे विरोधात आहे. अशा वर्तणुकीमुळे सभागृहाची प्रतिष्ठा मलिन होते.’’