जशोदाबेन मोदी यांनी घेतले श्री तुळजाभवानीदेवी आणि वैद्यनाथ यांचे दर्शन !

सोलापूर – पंतप्रधान नरेंद्र मोदी यांच्या पत्नी जशोदाबेन मोदी यांनी नुकतेच श्री तुळजाभवानीदेवी आणि पाचवे ज्योतिर्लिंग असलेले प्रभु वैद्यनाथ यांचे भक्तीभावाने दर्शन घेतले. सकाळी जशोदाबेन मोदी आणि त्यांचे चुलत बंधू अशोक मोदी तुळजापूर येथे आले. कोणतीही ओळख न सांगता त्यांनी साधेपणाने श्री तुळजाभवानी मातेची पूजा आणि आरती केली. पुजारी सचिन वसंतराव अमृतराव यांनी पूजेचे पौरोहित्य केले. या वेळी जशोदाबेन मोदी यांनी मातेचरणी फुले अर्पण करून देशाच्या सुख-समृद्धी आणि कल्याण यांसाठी प्रार्थना केली. दर्शनानंतर पुजार्‍यांनी मातेच्या प्रतिमा भेट देऊन मोदी परिवाराचा सन्मान केला. यानंतर जशोदाबेन मोदी यांनी परळी वैजनाथ येथे असलेल्या श्री वैद्यनाथ मंदिरात कुटुंबासह दर्शन घेतले. हे मंदिर १२ ज्योतिर्लिंगांपैकी पाचवे असून आरोग्य रक्षणासाठी विशेष महत्त्वाचे मानले जाते. देशभरातून भाविक येथे दर्शनासाठी येतात.

या वेळी जशोदाबेन मोदी यांनी दर्शनासाठी करण्यात आलेल्या व्यवस्थेविषयी प्रशासनाचे आभार मानले. संपूर्ण दौर्‍यात त्यांनी श्रद्धा, साधेपणा आणि धार्मिक परंपरा यांप्रती आदर व्यक्त केला.