‘मुख्यमंत्री तीर्थदर्शन योजने’त आणखी ११० तीर्थक्षेत्रांचा समावेश

मुंबई – मुख्यमंत्री तीर्थदर्शन योजनेत महाराष्ट्र शासनाने महाराष्ट्रातील ९५ आणि महाराष्ट्राच्या बाहेरील १५ अशा आणखी ११० तीर्थक्षेत्रांचा समावेश केला आहे. यापूर्वी महाराष्ट्रातील ६६ आणि महाराष्ट्राच्या बाहेरील ७३ तीर्थक्षेत्रांचा या योजनेत समावेश होता. या योजनेची व्याप्ती आणखी वाढवण्यात आली आहे.

सर्व धर्मीय नागरिकांसाठी महाराष्ट्र शासनाकडून ‘मुख्‍यमंत्री तीर्थदर्शन योजना’ राबवली जात आहे. या योजनेद्वारे अडीच लाख रुपयांपेक्षा अल्‍प वार्षिक उत्‍पन्‍न असलेल्‍या ६० वर्षे आणि त्‍यावरील वयोगटाच्‍या नागरिकांना तीर्थक्षेत्रांचे विनामूल्‍य दर्शन घडवण्‍यात येते. या योजनेत एका व्‍यक्तीला एकदाच लाभ घेता येतो. प्रतिव्‍यक्ती ३० सहस्र रुपयांपर्यंत या योजनेत व्यय निश्चित करण्यात आला आहे. यामध्‍ये प्रत्‍यक्ष प्रवास, भोजन, निवास आदी सर्व व्‍यवस्‍था शासनाकडून करण्‍यात येतो. या योजनेचा लाभ घेण्‍यासाठी लाभार्थी महाराष्‍ट्र राज्‍याचा रहिवासी असणे आवश्यक आहे.