बेळगाव जिल्‍ह्यातील (कर्नाटक) सौंदत्ती तालुक्‍यात निवडणुकीच्‍या पार्श्‍वभूमीवर १ सहस्र ६०० कुकर जप्‍त !

बेळगाव – बेळगाव जिल्‍ह्यातील सौंदत्ती तालुक्‍यातील तेग्‍गीहाळ गावात शेतातील शेडमध्‍ये मतदारांना वाटण्‍यासाठी अवैधरित्‍या साठवून ठेवण्‍यात आलेले १ सहस्र ६०० कुकर पोलिसांनी जप्‍त केले आहेत. या प्रकरणी सौंदत्ती पोलिसात गुन्‍हा नोंद करण्‍यात आला आहे. हे कुकर कुणी आणून ठेवले होते ? याची माहिती अद्याप मिळालेली नाही. कर्नाटक विधानसभेची निवडणूक जवळ येत असल्‍याने अनेक उमेदवार मतदारांना त्‍यांच्‍याकडे वळवण्‍यासाठी विविध भेटवस्‍तू देत आहेत, त्‍यातलाच हा प्रकार असल्‍याची चर्चा असून पोलीस या प्रकाराचे अधिक अन्‍वेषण करत आहेत.

याचसमवेत सीमावर्ती भागात रामदुर्ग पोलिसांनी एका गाडीत असणारी १ कोटी ५४ लाख रुपयांची रोख रक्‍कम जप्‍त केली आहे. पोलिसांनी संबंधित कारचालकाला कह्यात घेतले असून याची माहिती आयकर विभागाला देण्‍यात आली आहे.