मुंबई येथे ‘कॉपी’ करतांना पकडल्यानंतर विद्यार्थिनीने केली आत्महत्या !

मुंबई – परीक्षा चालू असतांना शिक्षकांनी ‘कॉपी’ करतांना पकडल्यानंतर नैराश्य आलेल्या १६ वर्षीय विद्यार्थिनीने आत्महत्या केल्याचा गंभीर प्रकार चेंबूर परिसरात घडला. मुलीला घाटकोपर येथील राजावाडी रुग्णालयात नेण्यात आले. तेथील आधुनिक वैद्यांनी तिला मृत घोषित केले. या प्रकरणी चेंबूर पोलिसांनी अपमृत्यूची नोंद केली आहे.

चेंबूर कॅम्प येथील इंदिरानगर परिसरात १६ वर्षीय मुलगी कुटुंबियांसमवेत रहात होती. ती इयत्ता नववीत शिकत होती.

११ एप्रिल या दिवशी परीक्षा चालू असतांना शिक्षकांना मुलीजवळ कॉपी सापडली. शिक्षकांनी मुलीच्या आईला शाळेत बोलावले आणि घडलेला प्रकार त्यांच्या कानावर घातला. या प्रकारामुळे नैराश्य आलेल्या मुलीने रहात्या घरी गळफास लावून आत्महत्या केली. मुलीच्या मृत्यूमुळे कुटुंबीय सध्या बोलण्याच्या मन:स्थितीत नाहीत; मात्र लवकरच त्यांचा सविस्तर जबाब नोंदवण्यात येईल, असे पोलिसांनी सांगितले. प्राथमिक अन्वेषणात कोणताही घातपात आढळला नाही, असे पोलिसांनी स्पष्ट केले.