कोपरगाव (नगर) येथील शिवभक्त अरविंद महाराज अनंतात विलीन !

सहस्रो भाविक आणि भक्त यांच्या उपस्थितीत शेवटचा निरोप

कोपरगाव (जिल्हा नगर) – येथील बालब्रह्मचारी शिवभक्त अरविंद महाराज यांचे २ जानेवारी या दिवशी दुपारी ३.२५ मिनिटांनी महानिर्वाण झाले. त्यांच्या पार्थिवावर ३ जानेवारीला दुपारी १ वाजता बाजारतळ भागातील श्री लक्ष्मीआई मंदिराजवळील मैदानात अंत्यसंस्कार करण्यात आले. सहस्रो भाविक आणि भक्त यांच्या उपस्थितीत साश्रू नयनांनी त्यांना शेवटचा निरोप देण्यात आला. अरविंद महाराजांचे बंधू दीपक नारायण नवाथे यांनी त्र्यंबकेश्वर येथील ब्रह्मवृंदांच्या वेदमंत्रोच्चारात पार्थिवाला मुखाग्नी दिला. महाराजांची अंत्ययात्रा सोमेश्वर महादेव देवस्थान कोपरगाव वेस येथून काढण्यात आली. त्यांच्या पार्थिवावर पुष्पहार अर्पण करून पुष्पवृष्टी करण्यात आली. या प्रसंगी परिसरातील संत, महंत, साधू, भक्तगण, महिला मोठ्या संख्येने उपस्थित होते.