मध्यप्रदेश येथे लता मंगेशकर यांच्या स्मरणार्थ संगीत अकादमी, संगीत विद्यापीठ आणि संगीत संग्रहालय स्थापणार !

मध्यप्रदेशचे मुख्यमंत्री शिवराजसिंह चौहान यांची घोषणा

भोपाळ (मध्यप्रदेश) – मध्यप्रदेशचे मुख्यमंत्री शिवराजसिंह चौहान यांनी लता मंगेशकर यांना श्रद्धांजली वाहत त्यांच्या स्मरणार्थ वृक्षारोपण केले. लता मंगेशकर यांचा जन्म इंदूरमध्ये झाला होता. या पार्श्‍वभूमीवर त्यांच्या स्मरणार्थ इंदूरमध्ये संगीत अकादमी, संगीत विद्यापीठ आणि संगीत संग्रहालय स्थापन करणार, तसेच त्यांचा पुतळा उभारण्यात येणार असल्याची घोषणा मुख्यमंत्री चौहान यांनी केली. ‘संगीत विद्यापिठात मुलांना सुरांचा सराव करता येईल, तसेच लतादीदींची सर्व गाणी संग्रहालयात उपलब्ध असतील’, असेही त्यांनी सांगितले.

राज्यसभेत लता मंगेशकर यांना श्रद्धांजली

नवी देहली – भारतरत्न लता मंगेशकर यांना संसदेच्या चालू असलेल्या अर्थसंकल्पीय अधिवेशनात श्रद्धांजली वाहण्यात आली.

 (सौजन्य : TV9 Marathi)

राज्यसभेत राज्यसभेचे सभापती तथा उपराष्ट्रपती व्यंकय्या नायडू आणि सभागृहातील सर्व सदस्य यांनी १ मिनिट मौन पाळून ही श्रद्धांजली वाहिली.

नेपाळच्या राष्ट्रपतींनी वाहिली श्रद्धांजली

काठमांडू (नेपाळ) – नेपाळच्या राष्ट्रपती बिद्यादेवी भंडारी यांनी नेपाळी जनतेच्या वतीने लता मंगेशकर यांना श्रद्धांजली वाहिली.

त्यांनी म्हटले, ‘अनेक नेपाळी गाण्यांना आपल्या मधुर आवाजाने सजवणार्‍या प्रसिद्ध भारतीय गायिका लता मंगेशकर यांच्या निधनाच्या वृत्ताने दुःख झाले. विलक्षण प्रतिभा असलेल्या स्वर्गीय लता मंगेशकर यांना मी भावपूर्ण श्रद्धांजली अर्पण करते.’