लालबाग सिलिंडर स्फोटप्रकरणी पिता-पुत्रावर मनुष्यवधाचा गुन्हा नोंद

मुंबई – लालबाग येथील सिलिंडरच्या स्फोटप्रकरणी मंगेश राणे आणि त्यांचा मुलगा यश यांच्या विरोधात काळाचौकी पोलिसांनी सदोष मनुष्यवधाचा गुन्हा नोंद केला आहे. या स्फोटात राणे पिता-पुत्र गंभीर घायाळ झाले असून उपचारांनंतर त्यांना अटक करण्यात येणार आहे, अशी माहिती पोलिसांनी दिली. लालबाग येथील साराभाई इमारतीत ६ डिसेंबर या दिवशी झालेल्या सिलिंडर स्फोटात दोन जणांचा मृत्यू, तर १४ जण घायाळ झाले होते. राणे यांचा खानपानाचा (कॅटरिंगचा) व्यवसाय आहे. गॅस गळती झाल्याचे काही नागरिकांच्या लक्षात आले होते; परंतु त्यावर उपाय करण्यापूर्वीच हा स्फोट झाला. या प्रकरणी कामगार, स्थानिक नागरिक, नातेवाईक यांचे जबाब नोंदवण्यात येत आहेत.

मृतांच्या कुटुंबियांना मुख्यमंत्री सहाय्यता निधीतून प्रत्येकी २ लाख रुपये, तर घायाळ झालेल्यांना ५० सहस्र रुपये आर्थिक साहाय्य देण्यात येणार आहे.