सांगली, २९ नोव्हेंबर (वार्ता.) – गेल्या ४ दिवसांपासून सांगली-कोल्हापूर जिल्ह्यांत कोरोनाची स्थिती दिलासाजनक आहे. गेल्या ३ दिवसांपासून कोल्हापूर जिल्ह्यात एकाही रुग्णाचा मृत्यू झालेला नाही, तसेच रुग्ण संख्याही सातत्याने घटत आहे. सांगली जिल्ह्यात रुग्ण मृत्यूचे प्रमाण २-३ इतके अल्प झाले आहे. २८ नोव्हेंबर या दिवशी कोल्हापूर जिल्ह्यात १९ नवे रुग्ण आढळले, तर सांगली जिल्ह्यात २१ नवे रुग्ण आढळले आहेत. सध्या कोल्हापूर जिल्ह्यात कोरोनाबाधित रुग्णांची संख्या ४३४ इतकी आहे. २८ नोव्हेंबर या दिवशी १ सहस्र ४०२ रुग्णांची सांगलीत चाचणी घेण्यात आली, त्यांपैकी १.५ टक्के बाधित आहेत.
