संतश्रेष्ठ ज्ञानेश्वर माऊली पालखी सोहळ्यानिमित्त ‘पुणे ग्रामीण’मध्ये वाहतूक पालट

पुणे – संतश्रेष्ठ ज्ञानेश्वर माऊली पालखी सोहळ्यानिमित्त १० ते १५ जुलै या कालावधीत पुण्याच्या ग्रामीण भागातील वाहतुकीत मोठे पालट करण्यात आले आहेत. पालखी मार्गावरील ७ ते ८ लाख भाविकांची सुरक्षा आणि संभाव्य वाहतूककोंडी टाळण्यासाठी जिल्हाधिकारी जितेंद्र डुडी यांनी पर्यायी मार्ग घोषित केले आहेत. पालखी १३ जुलै या दिवशी जेजुरी, १४ जुलै या दिवशी वाल्हा आणि १५ जुलै या दिवशी निरा येथे मुक्कामी असेल.

प्रमुख पर्यायी मार्ग खालीलप्रमाणे

सातारा, फलटण, लोणंद ते पुणे – निरा आणि जेऊर फाट्यावरून पुणेकडे जाणारी वाहतूक पूर्णपणे बंद राहील. ही वाहने निरा-मोरगाव-सुपा-कडेगाव चौफुला मार्गे किंवा मांडकी-वीर-सारोळा-सातारा हायवे मार्गे पुणेकडे जातील. बारामती, सातारा ते पुणे (जेजुरी मार्ग) – ही वाहतूक बेलसर फाटा-वाघापूर चौक ते उरुळी कांचन मार्गे वळवण्यात आली आहे.

पुणे ते सातारा, फलटण, बारामती – पुणे बाजूकडून जेजुरीकडे जाणारी वाहने सासवड-नारायणपूर-कापूरहोळ मार्गे किंवा पिसर्वे-सुपा मार्गे बारामती आणि फलटणकडे जातील.

लोणंद ते पुणे – लोणंद बाजूकडून निरा मार्गे पुणेकडे येणारी वाहतूक बंद राहील. ती लोणंद-शिरवळ-कापूरहोळ-खेड शिवापूर मार्गे जाईल.

पालखी सोहळ्याच्या काळात वाहनधारकांनी सहकार्य करावे आणि या पर्यायी मार्गांचा वापर करावा, असे आवाहन प्रशासनाने केले आहे.