गोमातेशी मानवाचे जन्मजन्मांतरीचे नाते ! – ह.भ.प. परेश बुवा देवळणकर

पुणे येथे प्रथमच मराठीत गोकथेचे आयोजन !

पुणे – गोमातेशी मानवाचे जन्मजन्मांतरीचे नाते आहे. आपले सर्व ज्ञान वेदांमधून आले असून वेद समजणे अवघड असल्याने पुराणांचा अभ्यास आवश्यक आहे. १८ पुराणे आणि ४ वेद यांमध्ये अनेक विषयांचा ऊहापोह असला, तरी गोमातेचे महत्त्व हा सर्व पुराणांमधील समान धागा आहे. विष्णुपुराणातही गोमातेचे महत्त्व वर्णन केले असून शिवपुराणात गोहत्येला ब्रह्महत्येसमान महापाप मानले आहे. गायीची सेवा हे परम पुण्य असून तोच खरा धर्म असल्याचे विविध पुराणांमध्ये सांगितले आहे, असे वक्तव्य ह.भ.प. परेश बुवा देवळणकर यांनी केले.

‘ग्रंथ पारायण दिंडी, पुणे’ आणि ‘गीताधर्म मंडळ, पुणे’ यांच्या संयुक्त विद्यमाने सदाशिव पेठेतील ‘गीताधर्म मंडळ’ येथे प्रथमच मराठीत गोकथेचे आयोजन करण्यात आले आहे. या वेळी गोकथेचे निरूपण करतांना ह.भ.प. परेश बुवा देवळणकर बोलत होते.

कथेच्या पहिल्या दिवशी कपिला गायीचे विधीवत पूजन करण्यात आले. या वेळी ग्रंथ पारायण दिंडीचे वीरेंद्र कुंटे, ‘गीताधर्म मंडळ’ अध्यक्ष प्राचार्य डॉ. मुकुंद दातार, वे.मु. ओमकार सप्रे आदी उपस्थित होते. याप्रसंगी गोशाळांचे व्यवस्थापन आणि गोसेवेचे कार्य निष्ठेने चालवणार्‍या गोशाळा संचालकांचा सन्मान करण्यात आला, तसेच विविध गोशाळांना आर्थिक साहाय्य आणि देणग्या यांचे वितरणही करण्यात आले.